سوشل میڈیا اور تحریک لادینیت (قسط اول)

اگرچہ فیس بک کی تخلیق تو چند آشنا اور عملی زندگی میں جان پہچان والے لوگوں کے انٹرنیٹ پر باہمی تعلق کی بنا پر ہوئی تھی۔ جس میں لوگ اپنی ذاتی تصاویر و معلومات اور زندگی میں ہونے والے واقعات اپنے دوستوں ،عزیزوں سے شیئر (Share) کرتے تھے۔
لیکن بہت جلد ہی انسانوں میں موجود منفی رجحانات اور اپنے نظریات کا دوسروں کو ہمنوا بنانے کی خواہش سے اول تو یہ فیس بک Fake Bookیعنی جھوٹ کا گڑھ بن گئی ۔ دوم یہ کہ اس پر مختلف مذاہب ، ممالک، سیاسی تنظیموں ، لسانی گروہوں اور رنگ بہ رنگ نظریات کے لوگوں میں نظریاتی جنگ چھڑ گئی یا پھر شاید چھیڑ دی گئی۔

قصہ مختصر یہ کہ فیس بک کو عالمی طاقتوں نے خلاف اسلام و پاکستان ،استعمال کرنے کا فیصلہ کیا۔ چنانچہ تقریباً عرصہ 5 سال پہلے سوشل میڈیا پر اردو زبان میں کچھ ایسے فورمز یعنی گروپس، پیجز اور اکاؤنٹس سامنے لائے گئے جن پر اسلام کے خلاف مواد پیش کیا جاتا تھا۔ یہ فورمز نظریہ الحاد، دہریت، سیکولرازم، لادینیت و ملّا منافرت نیز پاکستان مخالفت کی بنیاد پر بنائے گئے تھے۔
ان فورمز پر خدا کا انکار کیا جاتا، مذاہب کی توہین کی جاتی،  قرآن مجید میں کیڑے نکالے جاتے، نبی اکرم ﷺ کی ذات اقدس پر بہتان باندھے جاتے، عجیب و غریب الزامات لگائے جاتے، اسلامی تاریخ کو حد درجہ مسخ کرکے پیش کیا جاتا، مسلمانوں کو انتہا درجے کی بُری قوم بنا کر پیش کیا جاتا، نیز اسلام اور مسلمانوں کا دہشت گردانہ تصور پیش کیا جاتا۔ اس سب کے ساتھ ساتھ ان فورمز پر ہر وقت پاکستان کے خلاف زہر اگلا جاتا، اسے جنونیوں کی آماجگاہ بنا کر پیش کیا جاتا، اسے اقلیتوں کی مقتل گاہ کہا جاتا ہے ۔ یہ لوگ پاکستان کو ناکام ریاست ثابت کرنے کے لیے ایڑی چوٹی کا زور لگاتے نیز رائی کا پہاڑ بنا کر ہر چھوٹی موٹی خامی یا مسئلے کا ڈھنڈورا پیٹتے۔

یہ فورمز پاکستانی فوج کے بدترین دشمن ہیں۔ یہ ہر وقت فوج کے خلاف پراپیگنڈا میں مصروف رہتے ہیں۔ اسے پاکستان کا خون چوسنے والی بلا دہشت گردوں کی سرپرست اور ایک نکمّا چوکیدار قرار دیتے ہیں۔ یہاں لطف کی بات یہ ہے کہ ان سب سرگرمیوں سے ان کا مقصد معاشرے میں بہتری ہرگز مقصود نظر نہیں آتی، بلکہ ان کی منزل صرف اتنی ہے کہ ایک پاکستانی کے دل سے اسلام کی محبت کھرچ کر پھینک دی جائے اور پاکستان کو بطور اسلامی ریاست نہ رہنے دیا جائے۔

ان لوگوں کے نزدیک پاکستان کا قصور صرف اتنا ہے کہ یہ دو قومی نظریہ پر تخلیق ہونے والی اسلام کے نام پر بنائی گئی ریاست ہے۔ چنانچہ یہ ہمیشہ ملک خداداد میں برائی اور خامی ہی تلاش کرتے ہیں نیز اگر کوئی مثبت، بہتر یا قابل تعریف بات ہو تو اس پر ان کے فورمز اکثر خاموش ہی پائے جائیں گے۔

اگر ان لوگوں کے اسلام پر اعتراضات علمی و تحقیقی نیز تلاش حق و نیک نیتی کی بنیادوں پر ہوتے تو پھر بھی خیر تھی، کہ اصولاً پھر ان کے جوابات دینا یقیناً مسلمانوں کی اخلاقی ذمہ داری تھی۔ لیکن افسوس کہ ان لوگوں کے طریقۂ کار سے صاف طور پر بدنیتی و تخریب کاری جھلکتی ہے۔
مثلاً اگر ان لوگوں نے اپنی فیس بک آئی ڈیز یا اکاؤنٹس، سنجیدہ کام و انداز کی بنائی ہوتی تو پھر عموماً نام بھی خالصتاً اسلامی طرز و انداز والے رکھے جاتے۔ جیسا کہ میاں مصطفی ، غلام رسول، نعمان سعید ، سید عباس حیدر، اشبا نور، سیدہ عائشہ اور محمد اسلام وغیرہ ۔ ایسی آئی ڈیز سے یہ لوگ بہ آسانی مسلمانوں میں گھس کر ان سے بات چیت کرکے اسلامی موضوعات پر گفتگو کرکے ان کے ذہنوں میں وسوسہ ڈالتے ہیں۔

یونہی اگر فتنہ پروری و اسلام سے نفرت کی بناء پر آئی ڈیز بنائی جاتیں تو پھر نام بھی انتہائی گھٹیا و بیہودہ اور متعصبانہ رکھے جاتے جیسا کہ ملّا منافق ، کافر خان ، کافر شکاری ، مولوی استرا یا پھر محمد رام سنگھ وغیرہ۔ بہرحال ، نام اچھا ہو یا برا ، سنجیدہ ہو یا غیر سنجیدہ مقصد ان لوگوں کا وہی ہے جوپیچھے بیان کیاگیا۔ یونہی یہ لوگ فرداً فرداً بھی کئی قسم کی متعدد آئی ڈیز بناتے جو کہ مختلف مزاج و انداز کی ہوتی ہیں۔ اس سے مقصد یہ ہوتا ہے کہ ایک عام مسلمان کو یہ دھوکہ دیا جائے کہ مسلمانوں میں بہت تیزی سے لوگ اسلام کو چھوڑ رہے ہیں۔
ان فتنہ پرور لوگوں کے بدنیت ہونے کی تیسری علامت ان کا خود کو سابقہ مسلمان کہ کر مسلمانوں کو دھوکا دینا ہے۔ یہ مسلمانوں والے نام کی آئی ڈی بناتے، جب ہم اعتراض کرتے کہ”آپ لوگ غیر مسلم ہو کر مسلمان کیوں بن رہے ہیں؟“ تو ان کا جواب ہوتا کہ ”ہم پیدائشی مسلمان ہیں۔ البتہ بعد میں تحقیق کرکے اسلام کو غلط پایا اور پھر اسلام و خدا کو چھوڑ دیا“۔ لیکن لطف کی بات یہ ہے کہ ان میں سے آٹے میں نمک کے برابر بھی ایسے لوگ نہیں ہوں گے جو حقیقتاً پیدائشی مسلمان تو دور کی بات ہے۔ کبھی مسلمان بھی رہے ہوں۔ وگرنہ ہم نے تو یہی دیکھا کہ جب کبھی ایسے پیدائشی مسلمانوں سے بطور امتحان، چھوٹے موٹے اسلامی سوال کیے تو یہ لوگ جواب دینے میں ہمیشہ ہمیشہ نہ صرف ناکام رہے بلکہ بہانے بھی بنائے کہ ہم کوئی بہت اچھے مسلمان نہیں تھے وغیرہ۔ مثلاً ایک فیس بکی ملحد سے پوچھا کہ ”تہجد کی کتنی رکعات ہوتی ہیں؟ “ تو جواب ملا ”ہمارے تو کبھی فرائض بھی پورے نہیں ہوئے،  تہجد کا کیا معلوم ! “ ایک سے انتہائی بچگانہ سوال پوچھا کہ ”قرآن کی کتنی منزلیں ہیں؟ “ تو جواب دیا ”میں بہت زیادہ باعلم مسلمان نہیں تھا، میں کیا جانوں‘“ ۔

ذرا غور تو کیجیے کہ جو شخص ”اپنی تحقیق“ کے مطابق قرآن میں عربی کی غلطیاں اور سائنسی خامیاں بیان کررہا ہے، وہ یہ نہیں جانتا کہ قرآن میں منزلیں کتنی ہوتی ہیں۔ ایک صاحب نے تو حد ہی کردی، نام تھا ان کا ”یزید حسین“۔ ان کا دعویٰ تھا کہ وہ حافظ قرآن تھے اور تراویح بھی پڑھاتے رہے ہیں۔ ہم نے ان سے پوچھا کہ اگر تراویح کی ایک رکعت نکل جائے تو اسے کیسے پورا کرتے ہیں؟ تو موصوف کا انتہائی مضحکہ خیز جواب تھا ”چونکہ اسلام چھوڑے کئی سال ہوگئے ہیں، اس لیے اب میں بھول چکا ہوں“۔ کیا آپ یقین کرسکتے ہیں کہ ایک شخص انڈیا کا پیدائشی مسلمان ہو کر انڈیا میں ہی درس نظامی یعنی 8 سالہ عالم دین کورس کرنے کا مدعی ہو لیکن اسے اردو زبان نہ آئے؟ جبکہ اس کی آئی ڈی کا نام تھا ”منصور حلّاج “۔

یہ بھی پڑھیں:   نماز کی ادائیگی اور ہماری ترجیحات

سوال یہ ہے کہ جب آپ لوگوں نے مکمل تحقیق کے بعد ہی اسلام کو چھوڑا تھا تو پھر یہ کیسے ممکن ہے کہ آپ انتہائی سادہ و بچگانہ اسلامی باتیں بھی نہ جانتے ہوں؟ انکی بدنیتی کی چوتھی علامت ہے ان کا اسلام کے خلاف فضول قسم کا آخری حدوں کو چھوتا پراپیگنڈا۔ یہ لوگ جانتے ہیں کہ فلاں حدیث موضوع یا ضعیف ہے، فلاں الزام کا علماء اسلام پہلے سے ہی جواب دے چکے ہیں، فلاں مسئلہ پر مسلمان علماء نے شروحات حدیث میں طویل بحث کرکے جواب دیاہے، لیکن اس کے باوجود یہ لوگ بار بار نئے انداز سے نئی نسل کو دھوکا دیتے اور بات کا بتنگڑ بناتے ہیں۔ مثلاً ان لوگوں نے تاریخ ابن کثیر کے ایک صفحے کا عکس جس پر نبی اکرم ﷺ کے طلاق دینے والی آٹھ احادیث موجود تھیں، دکھا کر یہ شوشہ چھوڑا کہ معاذاللہ آپ ﷺ نفس پرست تھے جو شادیاں کرکرکے خواتین کو طلاق دیتے رہتے تھے۔ حالانکہ وہاں پر طلاق دینے کے ایک ہی واقعہ کو 6 مختلف روایات میں بیان کیا گیا تھا جسے ان لوگوں نے 6 طلاقیں بنادیا۔
پھر اس سب کے ساتھ ساتھ مختلف چیزوں میں ایڈیٹنگ کرکے مسلمانوں کو دھوکہ دینا اور صحیح کو غلط بنا کر پیش کرنا اس کے علاوہ ہے۔ دھوکہ دہی میں تو یہ لوگ اس حد تک جاسکتے ہیں کہ کسی بھی مخالف مسلمان کے فیس بک اکاؤنٹ سے اس کی پہچان والی خاص تصاویر چرا کر اور اس کے نام پر ہی اکاؤنٹ بنا کر ، مخالف آئی ڈی کی ہو بہو نقل تیار کرلیتے ہیں۔ اور پھر ایسے جعلی پروفائل سے یہ اس مسلمان کا نام استعمال کرکے ،اس کے خلاف کسی بھی قسم کا پراپیگنڈا شروع کردیتے ہیں، جس میں اس کے اسلام چھوڑ دینے تک کی جھوٹی خبر شامل ہے۔ اس طرح سے ایک تو اس مسلمان کو بدنام کردیا جاتا ہے اور دوسرا مسلمانوں کو ذہنی طور پر دھچکا پہنچا کر انہیں پریشان و مایوس کیا جاتا ہے۔ ان کم ظرف لوگوں کی بدنیتی کی پانچویں اور سب سے بڑی مثال ہے ان کا مسلمانوں کا دل دکھانے اور انہیں ذہنی اذیت پہنچانے کے لیے مقدس اسلامی شخصیات ،”قرآن“ خدا اور رسول ﷺ کی گستاخیاں کرنا، خاکے بناکر مذاق اڑانا، پھبتیاں کسنا اور یہاں تک کہ محمد عربی ﷺ کو ننگی گالیاں تک دینے سے گریز نہیں کرتے۔

بظاہر تو یہ سب ’’آزادی اظہار رائے‘‘ کے نام پر ہی ہوتا ہے لیکن ان کی بدنیتی کی عالم یہ ہے کہ انکے فورمز پر کوئی بھی ایسا مسلمان نہیں ٹک سکتا جو کہ اسلامی علم رکھتا ہو، ان سے مدلل بحث کرسکتا ہونیز جیسا سوال ویسا ہی جواب دینے کی اہلیت رکھتا ہو۔ ایسے مسلمان سے جان چھڑانے کا طریقہ واردات یہ ہوتا ہے کہ اچھی بھلی سنجیدہ و علمی بحث میں کچھ جعلی آئی ڈیز کے ذریعے طنز ”تضحیک اور گستاخی اسلام کا شامل کردی جاتی ہے۔ جونہی اس سب کی وجہ سے کوئی مسلمان طیش میں آتا ہے تو اسے فوراً ”بلاک“ یعنی اس فورم سے نکال دیا جاتا ہے۔اپنی مرتبہ یہ لوگ اتنے مہذب بنتے ہیں کہ اگر کوئی مسلمان ’’صاحب‘‘ نہ کہنے کی بھی غلطی کربیٹھے تو اسے وارننگ دے دی جاتی ہے جس کا اگلا قدم بلاک کرنا ہی ہوتا ہے۔

یہ لوگ انٹرنیٹ استعمال کرنے والی دنیا دار مسلمان عوام کے سامنے قرآن، حدیث وشریعتِ اسلام وغیرہ کے حوالے سے ایسی ایسی پیچیدہ، عقلی، علمی، فلسفیانہ و منطقی ابحاث چھیڑتے ہیں جن پر بات کرنا سادہ لوح عوام تو رہی ایک طرف خود ایسے علماء جنہوں نے صرف درس نظامی ہی کی ہو اور ذاتی تحقیق و مطالعہ نہ ہو، کے بس میں نہیں۔ اب ظاہر ہے عام قسم کے لوگوں میں، خاص قسم کے موضوع اور اسلامی بحثیں چھیڑنا، بددیانتی نہیں تو اور کیا ہے؟ قصہ مختصر، میں یہ سب تقریباً عرصہ 6 سے 7 ماہ تک دیکھتا رہا، دل ہی دل میں خون کے آنسو روتا رہا، کڑھتا رہا اور سوچتا رہا کہ انہیں کیسے روکا جائے؟

ایک عام مسلمان کو اس کی سچائی کا یقین کیسے دلایا جائے؟ آخر آمنے سامنے بیٹھ کر کرنے والی بحث، فیس بک پر کیسے ہوسکتی ہے؟ میں ان کے فورمز پر جا کر ان سے بحث کرتا، تاکہ ایک عام مسلمان کو تسلی ہوسکے کہ ان سوالوں کے جواب موجود ہیں۔ لیکن پھر بہت جلد مجھ پر ان لوگوں کا گھناؤنا کردار اور مکروہ چہرہ کھلتا چلا گیا۔ میں ان کے ہتھکنڈوں سے واقف ہونا شروع ہوگیا۔ مجھ پر یہ حقیقت واضح ہوگئی کہ ان کا مقصد کچھ سیکھنا یا تلاش حق ہے ہی نہیں۔ یہ لوگ تو صرف اور صرف مسلمانوں کو اسلام سے ورغلانے اور ان کے دلوں میں شکوک و شبہات پیدا کرنے کے لیے بیٹھے ہیں۔ آخر کار میں نے اپنے طور پر ان کے اعتراضات کا جواب دینے اور اسلا م کا دفاع کرنے کی ٹھانی۔ میرا مقصد تھا ایک عام مسلمان کو دین اسلام کی بنیاد، اصول و ضوابط اور مزاج کی ایسی سمجھ فراہم کرنا کہ جس کے بعد ایک عام مسلمان نوجوان کو اسلام کی سچائی پر مکمل یقین آجائے۔ نیز بنیاد سمجھ جانے کے بعد وہ غیر مسلموں کے اعتراضات کا جواب دینے کے خود قابل ہوجائے۔

یہ بھی پڑھیں:   سائنس اور مذہب کا تصادم

چنانچہ تقریباً 3 سال پہلے میں نے اپنے ہی فیس بک اکاؤنٹ سے یہ کام شروع کیا۔ اس وقت اس حوالے سے مسلمانوں میں کسی قسم کی کوئی آگہی نہیں تھی۔ پھرتقریباً عرصہ ڈیڑھ سال بعد مجھے کچھ ایسے احباب کا علم ہوا جو اس حوالے سے کام کرنے میں دلچسپی رکھتے تھے۔ لہٰذا ،انہیں ساتھ ملایا گیا۔ فیس بک پر ردّ الحاد، سیکولرازم و دفاع اسلام کا پہلا پیج ”رحمان والے“ سامنے آیا۔ اس کے ساتھ ہی ان نام نہاد فری تھنکرز، ملحدین کی جھوٹی فہم و دانش کے جواب میں ایک گروپ بنام ”آپریشن ارتقائے فہم و دانش“ کی بنیاد رکھی گئی۔  یہ فیس بک پر اس حوالے سے مسلمانوں کی نمائندگی کے اولین پلیٹ فارمز تھے۔ ان فورمز کی سب سے بڑی خصوصیت یہ تھی کہ یہا ں دیوبندی ، اہلحدیث اور بریلوی سب مل جل کر رہتے اور بغیر کسی مسلکی بحث میں پڑے صرف اسلام پر ہی بات ہوتی تھی۔ یہاں کسی بھی قسم کی مسلکی ابحاث پر سخت پابندی تھی۔ البتہ یہ ایک الگ بات ہے کہ ان فتنہ پرور لوگوں نے ہمارے فورمز پر آکر کس کس انداز میں اختلافی مسائل چھیڑ کر ہم میں پھوٹ ڈلوانے کی کوشش کی۔

چنانچہ یہیں پر اسلام کا درد رکھنے والے مسلمان اکٹھے ہونا شروع ہوئے اور فیس بکی جعلی ملحدین کے بارے شعور بیدار ہونا شروع ہوا، دیے سے دیا جلا اور مختلف طرز و انداز کے مسلمان گروپ سامنے آنے لگے۔ الحمدللہ ایک وقت وہ آیا کہ ان گستاخان اسلام کو ہماری طرف سے بھرپور جواب ملنے لگا، وہ ایک اعتراض کرتے، ہم پوراآرٹیکل تیار کرکے وضاحت کردیتے۔ فیس بک پر ان مخالفین اسلام کے مختلف طرز کے تقریباٍ 25 کے قریب مشہور پیجز تھے۔ ان میں مزاحیہ، شاعرانہ، کرکٹ کے، طالبان مخالف اور سیکولرازم و لبرل ازم کی نمائندگی کرنے والے رنگ بہ رنگ پیجز ہیں۔ ان پیجز میں ایک بات بالکل بنیادی و مشترک ہے اور وہ ہے ”ملّا منافرت“۔ یہ لوگ علماء کی کردار کشی میں انتہا درجے کے متشدد ہیں۔ چنانچہ یہ لوگ محسوس و غیر محسوس انداز میں علماء کی نفرت دل میں بٹھا کر مسلمانوں کو پہلے شریعت اور پھر اسلا م سے دور کررہے ہیں۔

قصہ مختصر یہ کہ ہمارے فورمز سے مسلمانوں کے گمراہ ہونے کے چانسز کم ہونے لگے۔ کیونکہ اب مسلمانوں کو یہ معلوم ہوچکا تھا کہ اگر اسلام کے خلاف کوئی دلیل دی جاتی یا اسلام پر اعتراض کیا جاتا ہے تو ہمیں فلاں فورم یا فلاں اشخاص سے اس کا جواب مل سکتا ہے۔ چنانچہ مسلمان نوجوان تیزی سے رابطہ کرنے لگے۔
اب ان لوگوں نے عاجز آ کر ایک نیا کھیل شروع کیا۔ اس کھیل نے درحقیقت مجھ سمیت میری پوری ٹیم کو ہلا کر رکھ دیا ۔ لیکن یہ درحقیقت ان کی بیوقوفی تھی کیونکہ اس سے ہمیں یہ فائدہ پہنچا کہ مخالفین اسلام کا اس قدر اہم اور خطرناک راز ہم پر ظاہر ہوگیا۔ جہاں ان کی ایک سازش سامنے آئی، وہیں برصغیر اور بالخصوص پاکستانی قوم کی خامیاں اور ان کے نقصانات کھل کر سامنے آگئے۔ وہ سازش یہ تھی کہ ان لوگوں نے فیس بک پر مسلمانوں، اسلامی تنظیموں، جماعتوں یا مسلکوں کے نام پر بہت سے اکاؤنٹس بنائے ہوئے ہیں۔ بظاہر آپ کو ایسا ہی لگے گا کہ اس فیس بک پروفائل کا حامل شخص نہایت دیندار اور کٹڑ اہلحدیث، دیوبندی یا بریلوی ہے جو کہ اپنے مسلک سے نہایت محبت رکھتا ہے۔لیکن درحقیقت اس کے پیچھے یہی کفار موجود ہوتے ہیں جو کہ دوسرے مسالک کے خلاف نہایت کثرت سے مواد پھیلاتے ہیں۔ یونہی جو اکاؤنٹس ایک عام مسلمان کا کردارظاہر کرتے ہوں گے، کچھ معلوم نہیں کہ بعد میں وہ کس قسم کا مواد پھیلانا شروع کردیں۔
چنانچہ طریقہ واردات یہ ہے مثلاً ایک اکاؤنٹ سپاہ صحابہ کے نام پر بنایا گیا ہے اور اس پر سپاہ صحابہ کے سرکردہ رہنما مولانا احمد لدھیانوی و فاروقی وغیرہ کی تصاویر اپلوڈ کرکے خود کو سپاہ صحابہ سے محبت کرنے والا ظاہر کیا جائے گا۔ اس اکاؤنٹ سے دن رات ”کافر کافر شیعہ کافر“ کے نعرے لگا کر جذباتی مسلمانوں کو اکٹھا کیا جائے گا۔ یونہی اہلحدیث و بریلوی مسلک کے خلاف بھی نفرت پھیلائی جائیگی۔ اسی طرح انہی لوگو ں کا ایک اکاؤنٹ ”دعوت اسلامی“ کے نام پر بھی دیکھا گیا جس پر دعوت اسلامی کے امیر مولانا الیاس قادری کی تصاویر جن پر ”میٹھا مرشد“ بھی لکھا ہوا تھا، اپلوڈ کی گئی تھیں۔ الغرض کہ اس اکاؤنٹ کے چلانے والے کو کسی انتہائی مخلص ”اسلامی بھائی“ کے طور پر پیش کیا گیا تھا۔ اس اکاؤنٹ سے خالصتاً اسلامی پوسٹس شیئر کی جاتیں اور یوں تقریباً 3500 مسلمانوں کو اکٹھا کرلیا گیا۔ہمارے سامنے یہ تلخ حقیقتیں بھی آئیں کہ یہ لوگ مسلمانوں میں نہایت اندر تک گھسے ہوئے ہیں۔ نیز انہیں مسلکی اختلافات کا ایک عام مسلمان سے زیادہ علم ہے۔ چنانچہ ان کے لیے دو یا زیادہ مسلمانوں کو لڑوانا کوئی مسئلہ نہیں ہے۔

ابھی تک اس قسم کے تمام فورمز کا مقصد مسلمانوں میں زیادہ سے زیادہ فرقہ ورانہ آگ بھڑکائے رکھنا تھا، لیکن کچھ ماہ قبل ان فورمز کا انتہائی گھناؤنا اور خطرناک استعمال سامنے آیا۔ اور وہ یہ تھا کہ ان لوگوں نے اسلام کا دفاع کرنے والے اپنے ایسے مخالفین جو ان کے لیے گلے کی ہڈی ثابت ہورہے ہوں، کی تصاویر چرا کر ان پر’نبوت کے دعوے‘ یا پھر گستاخیاں لکھ کر پھیلادیتے۔ یہ تصاویر وہ عموماً مسلمانوں کے فیس بک پروفائل سے چوری کرتے اور بعض صورتوں میں مخالف کے کمپیوٹر پرانٹرنیٹ وائرس کے ذریعے قبضہ (Hack) کرکے چوری کرتے۔
طریقہ واردات یہ اختیار کیا گیا، مثلاً کسی سید زادی کے نام سے جعلی اکاؤنٹ بنایا گیا جسے کافی مذہبی دکھایا گیا تھا۔ اس اکاؤنٹ پر 6 ماہ کے عرصہ میں سینکڑوں کی تعداد میں ’نفس پرست‘ اور بھولے مسلمان اکٹھے کرلیے گئے۔
پھر اچانک ایک دن اچانک اس اکاؤنٹ سے، میرے ایک نہایت مخلص ساتھی ’حافظ بابر صاحب‘ جن کی ان تخریب کاروں کے خلاف نہایت گرانقدر خدمات تھیں، کی تصاویر کے ساتھ انہیں انتہا درجے کا گستاخ رسول ﷺ لکھ دیا گیا اور ساتھ ہی یہ ترغیب بھی تھی کہ جسے ملے اور جہاں ملے، اس گستاخ کو جہنم واصل کرکے جنت کا حقدار بن جائے۔ اس تصویر (پوسٹ) کو چن چن کر ایسے مسلمانوں سے منسلک (Tag) کردیا گیا جو بہت زیادہ فرینڈز رکھتے ہوں یا بہت جذباتی و مذہبی ہوں، تاکہ جتنا ہوسکے یہ افواہ پھیل جائے۔

یہ بھی پڑھیں:   جدید ذہن اور انکار آخرت

آپ ہم مسلمانوں کا المیہ دیکھیے، یہ سوچ کر کہ اس پوسٹ کو ایک لڑکی نے اپلوڈ کیا ہے، اس لڑکی کو خوش کرنے کے لیے اس جھوٹی پوسٹ کو بے دریغ پھیلانا شروع کردیا۔ حتیٰ کہ کسی مسلمان کی زندگی کو خطرے میں ڈالنے والی اس بے بنیاد پوسٹ کے شیئرز 225 سے تجاوز کرگئے جو کہ فیس بک کی دنیا میں کافی مشکل کام ہے۔
کسی مسلمان نے، اس بیچارے کی گستاخی کا کوئی ثبوت مانگا اور نہ ہی اسے پھیلانے سے پہلے ایک مرتبہ تصدیق کرنے کا سوچا۔ یونہی وہ اکاؤنٹ جوتنظیم ’سپاہ صحابہ‘ کے نام پر بنایا اور کل تک فرقہ وارانہ بحثوں سے بھراہوا نیز ”کافر کافر شیعہ کافر“ کے نعروں سے گونج رہا تھا، پر ایک دن اچانک ایک پوسٹ اپلوڈ کردی گئی جس میں کوئی داڑھی والا شخص، شاید کسی تفریحی مقام پر اپنے ہاتھ سے اپنی تصویر(Selfie) کھینچ رہا تھا۔ اس تصویر پر لکھ دیا گیا کہ ”میں اللہ کا نیا نبی ہوں اور مجھ سے پہلے کی تمام شریعتیں منسوخ ہوگئی ہیں چنانچہ اب مسلمانوں کو میرا کلمہ پڑھ لینا چاہیے“ (خدا کی پناہ)۔ اور اوپر کلمہ درج کردیا گیا تھا ”لاالٰہ الا اللہ السلام فیصل رسول اللہ“۔ اس کے ساتھ ہی نبی کریم ﷺ کی شان میں گستاخی بھی کی گئی تھی۔

یہ تصویر والا شخص ہمارے لیے اجنبی نہیں تھا۔ یہ دفاع اسلام کے ہمارے بہت اچھے اور مخلص ساتھی جناب ’عبدالسلام فیصل صاحب‘ تھے۔ جنہوں نے اس محاذ پر دن رات ایک کردیا تھا۔ اس شخص کی مذہبی شناخت کا عالم یہ تھا کہ انہیں مشہور اہلحدیث لیڈر علامہ ابتسام الٰہی ظہیر تک جانتے تھے اور یہ حافظ عمر صدیق صاحب کے شاگرد اور دوست تھے۔
الغرض کہ ان کی طرف سے ایسی حرکت کا ذرہ بھر امکان نہیں تھا۔ مسلمانوں کے ان ’خونی پیاسوں‘ نے اس سے اگلا قدم یہ اٹھایا کہ حافظ عمر صدیق صاحب کی کسی کانفرنس سے لی گئی تصویر کے ساتھ یہ بیان جاری کردیا گیا کہ ”میں اس بات کی تصدیق کرتا ہوں کہ عبدالسلام فیصل کا دعوٰی بالکل صحیح ہے اور وہ واقعی نبی ہیں“ ( خدا کی پناہ)۔ یہاں بھی ہم مسلمانوں کی جہالت اپنے عروج پر تھی۔ بغیر کسی تصدیق کے، اس بے گناہ شخص کی زندگی کو خطرہ لاحق کردیا گیا۔ لوگ دروازہ بجا بجا کر عبدالسلام فیصل پرالزام عائد کرنے اور غیظ و غضب کا اظہار کرنے لگے۔ آخر کار اس بیچارے کو گھر سے روپوش ہونا پڑا ۔ یہاں تک کہ طالبان نے تو”بھرپور جذبۂ اسلامی“ کا ثبوت دیتے ہوئے حافظ عمر صدیق صاحب کے مدرسہ ”جامعہ محمدیہ“ کو بم سے اڑانے تک کی دھمکی دیدی۔ طرفہ تماشا یہ ہے کہ الزامات کی اس بہتی گنگا میں فرقہ پرست عناصر بھی ہاتھ دھونے سے پیچھے نہ رہے۔ چنانچہ دیوبندی و بریلوی مکاتب فکر کے لوگوں نے اس افواہ کو یہ کہہ کر قبول کرلیا کہ ”انہوں نے پہلے بھی مرزا قادیانی کا ساتھ دیا تھا لہٰذا ان غیر مقلدوں کے نزدیک ہوسکتا ہے اب عبدالسلام فیصل کی نبوت بھی جائز ہوگئی ہو “۔ سو لیجیے جناب !!! کٹڑ قسم کے بریلوی و دیوبندی عوام کے لیے غیرمقلدوں کے خلاف اپنے ”خیالات زریں“ کے اظہار کا بھرپور موقع تیار تھا، لہٰذا اس بہتان عظیم کو مسلمانوں کے دونوں گروہوں نے بھی پھیلانا شروع کردیا۔

اس مافیا کا اگلا شکار، ان سطور کا راقم بذات خود تھا۔ 12 دسمبر 2014 کو ’سپاہ صحابہ‘ کے نام پر بنائے گئے، کافروں کے اس جعلی اکاؤنٹ سے، میری تصویر پر ”حضرت زوہیب زیبی علیہ سلام“ لکھ دیا گیا۔ اس اکاؤنٹ کے ’کور فوٹو‘ پر میرے نام کا جھوٹا کلمہ ”لا الٰہ الا اللہ زوہیب رسول اللہ‘‘ لکھ دیا گیا (العیاذ باللہ تعالیٰ)۔ اس کے ساتھ ہی پہلے کی طرح ، عبدالسلام فیصل صاحب والے انداز میں، میری تصویر کے ساتھ وہی سب کچھ لکھ دیا گیا کہ ’’ یہ اللہ کا نیا نبی ہے، پچھلی تمام شریعتیں منسوخ ہوگئیں اور مسلمان اب زوہیب کا کلمہ پڑھیں‘‘( نقل کفر، کفر نہ با شد)۔ پھر پہلے ہی کی طرح ” دارالافتاء فیضان شریعت“ کے لیٹر پیڈ پر دیے گئے ایک فتوے میں ایڈیٹنگ (جعلسازی) کرکے اوپر دارالافتاء کے نام و پتہ نیز نیچے دستخط و مہر والا حصہ تو اصل رہنے دیا گیا جبکہ بیچ والے حصے میں ’سنّی اتحاد کونسل‘ کی طرف سے جعلی تصدیق نامہ لکھ دیا گیا کہ ”ہم سنّی اتحاد کونسل کے علماء ایک اجلاس میں زوہیب سے ملے ہیں اور وہ واقعی نبی ہے“ ( خدا کی پناہ )۔

تحریر کا بقیہ حصہ یہاں ملاحظہ فرمائیں۔

(640 مرتبہ دیکھا گیا)

آپ یہ صفحات بھی دیکھنا پسند کریں گے ۔ ۔ ۔

تبصرہ کریں